反對《民族團結進步促進法》
終結官警黑勾結 停止跨境鎮壓
2019 年 7 月 21 日，香港人經歷咗永遠無法忘記嘅一日。
當日下午，數以十萬計市民再次走上街頭，反對送中惡法，繼續為香港自由、民主發聲。於香港絕跡數年嘅「光復香港，時代革命」再次響徹前往中聯辦嘅路上，象徵住香港人所追求嘅，已經唔再只係撤回送中惡法，更係對自由、公義同未來嘅盼望。
然而，當夜幕降臨，元朗西鐵站內卻發生震驚世界嘅一幕。大批白衣暴徒喺元朗西鐵站內手持武器，無差別襲擊市民、記者同途人，在場警察卻選擇轉身離去，警方隨後更將元朗多間警署落閘拒絕市民報案。
對好多香港人嚟講，七二一唔單止係一宗暴力事件，更象徵住法治、公義同問責受到前所未有嘅衝擊。官警黑勾結亦由此成為香港人對七二一事件最深刻嘅集體記憶。
七年過去，傷痕未曾因歲月而淡去；歷史，亦從來唔應該被遺忘。
然而，威權並冇停下腳步，我哋面對嘅，已唔再只係一座城市嘅故事，而係一場跨越地域、針對自由與民主價值嘅挑戰。
近日，暴力恐嚇再次伸延至海外，香港黑社會遠赴台灣襲擊民主人士，事件再次反映跨境鎮壓以及官警黑暴力威脅仍然存在，亦令人再次憶起七二一暴力犯罪壓制異見嘅陰影。
與此同時，《民族團結進步促進法》將進一步收窄海內外言論自由以及少數民族權利嘅空間。當權力缺乏制衡，法律繼續成為壓迫異見工具。
由元朗七二一，到今日多宗備受關注嘅跨境打壓事件；由香港街頭，到海外社會，時代或許改變，地點或許不同，但威權對自由嘅侵蝕始終未曾停止。
正因如此，我哋更加唔能夠遺忘。
今年七月，誠邀每一位珍惜自由、民主、人權同法治嘅朋友，一同嚟到中國駐英國大使館外，以和平方式集會，毋忘歷史，拒絕恐懼。
因為記憶，唔應該被抹去；
因為公義，唔應該被遺忘；
因為沉默，只會令威權變得更加肆無忌憚。
日期：2026年7月25日（星期六）
時間：下午兩點至三點
地點：中國駐倫敦大使館 49-51 Portland Pl, London W1B 1JL
- 5349115a-e7a5-437e-a079-b7c0fbaaba07.jpg (238.06 KiB) 已瀏覽 22 次
