【支聯會案：係一種對智力嘅抗爭】

[matrix]

［支聯會案：係一種對智力嘅抗爭］

今日831，所以都要抌低手頭上嘅工作去出返篇文。

七年前，我成日都會同人講抗爭係出於良心。但係去到今日，我會覺得抗爭出於智商。

當然我唔係法律專家，但係法官喺支聯會案嗰種邏輯謬誤簡直大開眼界。三個唔係中國憲法專家嘅法官可以用字面解釋嚟去審人已經係可笑。咁樣嘅邏輯咪即係識中文嘅人都係中國憲法專家？而且鄒幸彤已經多次質問返法官，唔通要求修改憲法都係犯法？其實憲法係可以修改嘅，不過你要求修改憲法又係犯法喎。咁人大常委，修改憲法咪犯咗「國安法」？

再講法庭嘅邏輯，真係開始懷疑佢哋個思維要有幾跳脫先可以得出一個咁嘅結論：

結束一黨專政 = 結束中國共產黨嘅領導地位 = 中共領導地位屬於中國憲法確立嘅根本制度 = 「結束一黨專政」就是結束中共領導 = 因此目標涉及推翻／破壞根本制度 = 國安法下屬於顛覆 = 公開持續宣傳此目標 = 煽動 = 即使沒有暴力，也可以屬「其他非法手段」。

運用呢一種邏輯嘅話，咁樣飲水會減少地球資源，所以影響到全人類安全，影響全球嘅安全會影響到中共領導嘅合法性，所以犯咗「國安法」！一種嘅邏輯竟然冇攞白卡，仲要做埋法官，真係國難！

法官仲死都咬住話六四集會煽動或支持一九年嘅「暴動」。呢個仲好笑，明明搞咗35年都冇暴動，冇時間表，冇計劃。其實係集體唱歌同埋嗌口號。同返教會冇乜分別。喺冇證據之下都可以入罪，呢三個法官其實係讀過啲咩書嘅呢？

再講支聯會嘅創黨核心人物，係司徒華同李柱銘，亦係民主派嘅創黨成員。佢哋兩個人又係基本法草擬成員之一，又支持中國入WTO。而民主派積極叫人唔好勇武抗爭，唔好爭取港獨，其實佢哋都可以話愛國愛黨。

其實小編對民主黨同支聯會唔係有太大嘅感覺。甚至去到後期，我覺得係一個比泛民抽政治水嘅活動。但係邏輯上我哋一定要知道佢哋坐緊政治監。嗰種「佢哋抵死」、「佢哋預咗㗎啦」嘅諗法，係中共想install入我哋思想裏邊。令到佢哋一種唔合邏輯嘅領導變成常態。

#支聯會案 #鄒幸彤 #李卓人 #何俊仁

Source: 香港民主運動 HKDM2