文章
由 emily »
「好簡單就係話俾人聽，仲有人。你堅持就會發現，仲有人堅持。」
「荔記」創辦人 尚木、發仔、消防
＊＊＊＊＊
兩個星期前，團購平台「荔記」開設 IG、FB，正式開始營運，「我哋承諾咗，每個月盈利會抽返部分出嚟，做返在囚支援」，尚木說。
「荔記」，顧名思義就是荔枝角收押所，他們在網上平台的自我介紹，是「三個盛夏出冊的傻佬」：尚木因藏有爆炸品判監四年；發仔分別因 16 年和 19 年參與暴動，前後判監七年；消防則因藏有汽油彈、非法集結等判監 34 個月，他們在是荔枝角「DM 5」期數一同「拋」的囚友。
「即係一齊執番梘？」
「好多人 FF 我哋，哈哈。」發仔笑著說，「我成日話，我哋好似去咗男校寄宿，半個期數都係手足。」
當初發起要辦「荔記」的，正是三人中在囚時間最長的發仔，「你自己俾人支援過， 好感受到有個必要，令呢樣嘢持續落去。」發仔說，相比現時在囚或將入獄的人，他們三人其實比較幸運，「因為我哋比較早期（入獄）」，以發仔為例，他 2020 年初已還押，他形容當時的支援「可能一比十」，即是一個在囚人士有十人在外支援，「而家係調返轉。」
「支援最多嘅時候，大家就係出面保釋緊，真正開庭嘅時候，移民嘅移民、淡忘嘅淡忘…仲堅持緊嘅人，一定比當初少。」消防補充道；尚木則指，他認識不少朋友剛入獄或即將入獄，「以前個個都有私飯食，而家連報紙都無人幫佢訂」，亦是這些現實狀況，令他們決意要辦「荔記」。
理想歸理想，現實還現實，他們亦一再強調，首要目標是在商言商養活自己，「總之做生意，一定要賺到錢，你開間 cafe 唔好同我講因為你鐘意飲咖啡…唔死先可以做到興趣。 」尚木說。
首先要令自己存續，所以他們的經營模式亦經多番調整，由原本計劃過開實體店賣生果，後因考慮租金等因素，改做網上團購減少成本，荔記開張半個月，剛做完第一單生意：生果團購。
但一如所料，出現很多新手的「蝦碌」。
「嗰啲係低能錯誤。」自稱在團隊中負責「屌人」的消防說；「呢個我解釋返，」負責管數的發仔稱，自己是錯誤的經手人，「條 execl 表程式，拉少咗幾行，計漏咗」，結果他們訂的第一批生果，訂少了幾十個火龍果。
「錢又收咗，點樣俾貨啲客呀…我哋退錢無問題，但係啲客話，唔緊要啦，你俾第二樣嘢我。」消防說。
「我覺得好內疚，一方面好 warm，另一方面更加督促自己，咁樣係唔啱，要更 professional 去做好件事。」發仔說。
本身有營商經驗、負責客戶服務的尚木，就發現自己過去的經驗，在新行業未必合用，「原來紅日運輸公司唔送貨」，「例如今日有個客就話，唔得我 12 點預咗個榴槤開 party」，尚木說若果只是自己的生意，他可能會答「運輸係咁，紅日你唔係 expect 我返工呀？」但當他們同時承擔了支援的目標，就要做多一點，「我今朝就自己去批發商度拎，再送過去。」
三人都表示，希望可以將「荔記」經營成一個品牌，「起碼我哋自己生存到，唔會死先幫到人」，但現時只是草創階段，資金規模都有限，能做的可能都只是「課金」買物資，未來可能會開信箱做寫信配對，但即使如此能做的始終有限，發仔說，他更希望能讓在內的人知道，外面仍然有人記得他們，「俾人 feel 到原來未死曬㗎出面，仍然有人同佢哋有 connection。」
「一定要俾人知道，有啲人仲關心緊，仲有人喺香港，唔係個個走晒，好簡單就係話俾人聽 ，仲有人。」尚木說；一直較沉默、在三人中最年長的消防則相信，有燈就有人，「我覺得 action speaks louder than words。」
但無可避免的問題是，他們的身分和正在做的事，或者會有風險，石牆花等支援組織都一一遇險解散正是先例。
「我地做生意咋嘛，更生人士做生意。」發仔一如既往的開朗笑著說。
「李家超都講，要幫啲更生人士㗎。」尚木接著道。
「我哋咪係更生人士，想幫返啲更生人士。」在三人的笑聲中，消防如此總結。
-
附加檔案
-
- 308017038_136852789100020_8939382240196227882_n.jpeg (712 KiB) 已瀏覽 1024 次
